Ăхпуç вулавăшĕ Сурхури йĕркелесе ирттернĕ

Пишпÿлек тăрăхĕнчи Ăхпуç ял вулавăшĕ (ертÿçи - Лия Кириллова) чăвашсен йăлана кĕнĕ хĕллехи Сурхури уявне йĕркелесе ирттерчĕ. Кашни çулах, Кăшарни эрнинче, çамрăксем те, аслă ăрурисем те чăваш халăхĕн наци уявне хастар хутшăнаççĕ. Ачасем уяв ячĕпе саламласа ыр сунаççĕ, Раштава мухтаççĕ.

Тĕрлĕ тум тăхăнса килĕрен киле Çветке çÿресси мĕн авалтанах пырать. Çветке çÿрекенсем кил хуçисене ырлăх-пурлăх, тулăх тыр-пул, килти выльăх-чĕрлĕхе ĕрчеме, кил-йыша сывлăх сунаççĕ. «Карта тулли выльăх пултăр, сак тулли ача пултăр», - ыр сунса калаççĕ хăнасем кил хуçисене. Хуçасем ырă кăмăллă хăнасене тав туса тĕрлĕ апат-çимĕçпе сăйлаççĕ, пылак кучченеçсем валеçсе параççĕ.

Çак уява эпир çамрăксемпе пĕрле ирттеретпĕр. Çитĕнекен ăру хамăр йăла-йĕркесене пĕлтĕр, тăван халăх культурипе мăнаçлантăр тесе тăрăшатпăр.

Лия КИРИЛЛОВА, вулавăш ертÿçи.