Пушкăртстанра ял хуçалăх продукцине экспорта ăсатасси икĕ хут ÿснĕ

Республикăри агропромышленность комплексĕн продукцине чикĕ леш енне сутассин калăпăшĕ ÿсни «Пĕтĕм тĕнчери коопераци тата экспорт» наци проекчĕн тĕллевĕпе килĕшсе тăрать.

 - Пилĕк çул хушшинче Пушкăртстанри агропромышленность комплексĕн продукцине экспорта ăсатасси икĕ хута яхăн ÿснĕ, - палăртнă правительствăн вице-премьерĕ – ПР ял хуçалăх министрĕ Ильшат Фазрахманов.  – Çак вăхăт хушшинче 3 млн тонна ытла продукци, 1,8 млрд долларлăх, сутнă.

Экспорта ăсатнă ял хуçалăх продукцийĕн 67 ытла проценчĕ çу продукцийĕ, 20% яхăн апат-çимĕç тата тирпейлекен промышленность продукцийĕ, 3% ытла сĕт-çу продукцийĕ, 3% - тĕш тырă культурисем, 3% - ыттисем.

ПР Ял хуçалăх министерствинче пĕлтернĕ тăрăх, ĕç йăлана кĕнĕ партнерсемпе те пырать, çавăн пекех экспорт валли çĕнĕ рыноксене  те алла илеççĕ. Паянхи тĕп рыноксем – Казахстан, Турци, Узбекистан, Китай тата Азербайджан.

«Пĕтĕм тĕнчери коопераци тата экспорт» наци проекчĕ «Тивĕçлĕ тата тухăçлă ĕç, ăнăçлă предпринимательство наци тĕллевĕн витĕмĕпе пурнăçа кĕрет. Унăн тĕп тĕллевĕ - 2030 çулччен чĕртавар тата энергетика таварĕсен шутне кĕмен таварсене  2020 çулпа танлаштарсан -  70% çитересси.