«Пушкăртстан» наци паркĕн фотокапкăнне çÿлевĕç çакланнă

Тискер чĕр чун хĕллехи вăрман тăрăх хуçа пек васкамасăр утать. Çÿлевĕç - наци паркĕн чи вăрттăн та асăрхануллă хуçисенчен пĕри. Хĕлле вăл вăй-халне перекетлет, сахалрах утса çÿрет, хÿтлĕхре пытанса пурăнать, сунара каç сĕмлĕхĕнче е çĕрле çеç тухать. Çăра çăмлă сарлака урисем кĕске йĕлтĕр пекех – вĕсем кăпăшка юр ăшне путма памаççĕ тата тупăшĕ патне шăппăн йăпшăнса пыма пулăшаççĕ.

Çÿлевĕç хăй тупăшĕ çине тĕллĕ сикет. Ăна хăвалама мар, кинет тапăнма кăмăллать. Çавăнпа ăна хÿтлĕх, ишĕлчĕк, çил-тăвăл йăвантарнă йывăçсем кирлĕ. Çÿлевĕç ытларах чухне тискер чĕр чунсен сукмакĕсем тăрăх утать, унта тупăша кĕтсе илме çăмăлрах.

Наци паркĕн пресс-службинче палăртнă тăрăх, видео çинче вăл ахаль уçăлса çÿремест. Çÿлевĕç çывăхра тупăш пуррине сиснĕ.

Автор: Надежда Родионова

Читайте нас