Çăмăллăхсемпе усă куракансем электричкăсемпе çур хакпа çÿрĕç

Апрель уйăхĕн 1-мĕшĕнчен пуçласа октябрь уйăхĕн 31-мĕшĕччен Пушкăртстанра социаллă пулăшу илме тивĕç çынсене регион çăмăллăхĕпе тивĕçтерĕç: вĕсем хула çывăхĕнчи пуйăссемпе çÿренишĕн 50% таран йÿнерех тÿлеме пултарĕç. Пĕлтĕр çавăн пек çăмăллăхпа республикăра пурăнакан 550 пин çын усă курнă. Вĕсем – пенсионерсем, ĕç ветеранĕсем, репрессире пулнă тыл ĕçченĕсем.

Билет туяннă чух çăмăллăх правине çирĕплетекен документ тата паспорт (оригинал) кирлĕ.

Федераци çăмăллăхĕсемпе усă куракансен вара тÿлевсĕр çÿреме ирĕк пур. Вĕсем – сусăр çынсем, çар хирĕç тăрăвĕсен, Тăван çĕршывăн Аслă вăрçин ветеранĕсем, блокадăри Ленинградра пурăннисем.

Пушкăртстанри шкул ачисемпе студентсем сентябрь уйăхĕн 1-мĕшĕнчен пуçласа июнĕн 15-мĕшĕччен çур хакпа çÿреме пултараççĕ.

Аса илтерме. Ака уйăхĕн 1-мĕшĕнчен электричкăсем çуллахи чарăнусенче чарăнма тытăнĕç.

Автор:Надежда Родионова

Читайте нас

Партнеры