Выпускниксем хăйсен пĕлĕвĕсене тĕрĕслеççĕ

ПР Вĕрентÿ министерствин кăтартăвĕсем тăрăх, кăçал ЕГЭне хутшăнма 17 пин шкул ачи регистраци иртнĕ. Выпускниксем суйласа илнĕ чи паллă предмет каллех профильлĕ математика пулнă – ăна экзамен тытакансен 62 процентне яхăн вĕренекен суйланă. Яланхи пекех обществознанипе интересленесси пысăк. Çав вăхăтрах информатикăпа, физикăпа, биологипе тата химипе кăсăкланасси ÿсет.

Тепĕр массăллă тĕрĕслевсем июнĕн 4 тата 8-мĕшĕсенче иртĕç. Çак кунсенче выпускниксем вырăс чĕлхипе, математикăпа (тĕп тата профиль шайĕсене) экзамен параççĕ. Июнĕн 11-мĕшĕнче обществознанипе физика, июнĕн 15-мĕшĕнче биологи, географи, ют чĕлхе (çыру пайĕ), июнĕн 18-19-мĕшĕсенче информатика тата ют чĕлхе предмечĕсемпе (калаçу пайĕ) иртĕ. Пур предметпа та экзамен тытма июнĕн 22-мĕшĕнчен пуçласа 25-мĕшĕччен резерв кунĕсем палăртса хăварнă.

Иртнĕ çулхи пекех выпускниксен экзаменра илнĕ паллисене лайăхлатма, хăйсем суйласа илнĕ предметсемпе тепĕр хут экзамен тытма май пур.

Тĕрлĕ сăлтавсене пула тĕп предметсемпе экзамен тытайман е начар паллă илнисем сентябрь уйăхĕн 4-25-мĕшĕсенче тепĕр хут экзамен пама пултараççĕ.