Мунчари пушара пула пурнăçĕ татăлнă

Паян ир-ирех Туймазă хулинчи Монолитная урамĕнчи пĕрене мунча çуннă. Инкек пулнă вырăна çитнĕ хăтаруçăсем пушара тĕп тунă.

 - Шел пулин те, пушара сÿнтернĕ вăхăтра çуртпа мунча хушшинчи хуралтăра 78 çулхи арçыннăн ÿтне тупнă. Пушар сăлтавне тата пулса иртнин лару-тăрăвне уçăмлатаççĕ, - пĕлтернĕ Инкеклĕ лару-тăру министерствин регионти Тĕп управленийĕнче.

Çăлавçăсем çине тăрсах кăмака оборудованине асăрхаса тăма сĕнеççĕ. Кирпĕч кăмакапа  тĕтĕм тухмалли мăрье хушшине тĕрĕслесех тăмалла. Çурăксем – çулăм патне илсе çитерекен тÿрĕ çул.

 - Пушар пирки систерекен прибор вырнаçтарăр, - сĕнеççĕ хăтаруçăсем. -  Çак йÿнĕ япала хăйĕн хытă сассипе вăратма, тĕтĕм тухни çинчен систерме пултарать, çĕрле те пурнăçа çăлать.