Культура объекчĕсене çĕнетме 3 млрд тенкĕ тăкакланă

Республика ертÿçи хушса каланă тăрăх, юлашки пилĕк çул хушшинче регионти культура учрежденийĕсене çĕнетме тата культура проекчĕсене пурнăçа кĕртме 3 млрд тенкĕ яхăн тăкакланă. «Культура» тата «Çемье» наци проекчĕсене, тĕрлĕ патшалăх программисене хутшăннă май, 170 культура объектне хăпартнă, тĕпрен юсанă. Тата 126-шне паянхи куна тивĕçтерекен оборудованисем, юрă-кĕвĕ инструменчĕсем уйăрса панă.
«Пĕчĕк Тăван çĕршывăн культури» парти проекчĕ ялсенчи 492 культура çурчĕн тата 9 театрăн пурлăх никĕсне çĕнетме пулăшнă. Вĕсем валли сцена тата наци тумĕсем, юрă-кĕвĕ инструменчĕсемпе оборудованисем, çемçе креслăсем туяннă. Театрсен репертуарĕ 52 çĕнĕ спектакльпе пуянланнă.
– Çакăн йышши пулăшăвăн кăтартăвĕ пур. Республикăри пултарулăх ушкăнĕсем Пĕтĕм Раççейри фестивальсемпе конкурссене ытларах хутшăнма пуçларĕç. Пирĕн театрсем пысăк мероприятисем йĕркелесе ирттереççĕ, çав шутра – Пĕтĕм тĕнче шайĕнчисем. Çакă питĕ лайăх пулăм, – тенĕ Радий Хабиров.
Çакна пĕр тĕслĕхпе çеç çирĕплетсе хăварас килет: наци проекчĕсем Пишпÿлекри Культура керменĕнчи «Мерчен» чăваш халăх фольклор ансамблĕн кабинетне те çĕнетме майсем туса панă. Патшалăх пулăшăвĕпе усă курса хыçлă çемçе пукансем, тумсене упрамалли шкап, тĕкĕрлĕ комод туяннă.
– Пирĕн коллективăн пурнăçĕ пĕр вырăнта тăмасть. Нумай пулмасть Тутарстан Республикинче Раççей шайĕнчи чăвашсен Уявĕнчен таврăнтăмăр. Халĕ чăваш хĕрĕсен çи-пуçне, тухьяна, çĕнетессипе ĕçлетпĕр. Малашнехи ĕç планĕсем пысăк. Ушкăн йышĕнче тĕрлĕ ÿсĕмри çынсем пур, çав шутра ача-пăчасем те. Чăваш ушкăнĕн кабинетне çĕнетни, çĕнĕ сĕтел-пукансем туянни малалла та тăрăшса ĕçлеме хавхалантарать, ушкăн пайташĕсен кăмăлĕсем пушшех çĕкленчĕç, – тенĕ «Мерчен» чăваш халăх фольклор ансамблĕн ертÿçи Людмила Романова.