«Çамрăксемшĕн Журналистсен союзĕ модăна кĕнĕ»

Аса илтеретпĕр, ĕнер, октябрь уйăхĕн 29-мĕшĕнче, Мускавра Раççейри Журналистсен союзĕ XIII отчетпа суйлав съезчĕ иртнĕ. Унта делегатсем Владимир Соловьева тĕпĕр хут пуçлăх пулма суйланă.

- Хисеплĕ Владимир Геннадьевича хамран тата Пушкăртстанри журналистсен ятĕнчен ăна Раççей Журналистсен союзĕн председательне суйланă ятпа саламлатăп. Ăна тата унăн командине çирĕп сывлăх, ĕçре çитĕнÿсем, хавхалану, таса та тÿлек тÿпе сунатăп. Çак çулсенче пирĕн йыш та чылай  ÿсрĕ, паянхи кун пирĕн республикăри организацинче 1700 çын. Съездра пирĕн делегаци йышлисенчен пĕри пулчĕ, - палăртнă Пушкăртстанри Журналистсен союзĕн председателĕ Вадут Искаков.

Съезд мĕнле иртни çинчен хăйĕн шухăшĕсене БСТ телеканалăн информаци программисен тĕп специалисчĕ Гульдария Юсупова тележурналист пĕлтернĕ:

- Съезд ĕçлĕ тата кăмăллă лару-тăрура иртрĕ. Малашнехи пилĕк çул валли кирлĕ тата пĕлтерĕшлĕ йышăнусем турĕ. Умри тĕллевсенчен пĕри вăл обществăра журналист профессин ят-сумне ÿстересси пулса тăрать. Ыйтăва çапла лартни хавхалантарчĕ çеç мар, Раççейри Журналистсен союзĕн предселаделĕ пулма суйланă Владимир Соловьев команди юлашки пилĕк çулта журналистсене социаллă тата профессии енчен хÿтĕлес тесе тунă пĕлтерешлĕ утăмсене аса илтерчĕ. Союзăн сайтĕнче яланах регионти çĕнĕ хыпарсене вырнаçтараççĕ. Çакă та Раççей регионĕсенчи мĕнпур ĕçтешсене пысăк пĕрлĕхĕн пĕр пайĕ пулса тăнине туйма май парать. Юлашки çулсенче Мускавра иртекен тĕлпулусенче  официаллă ларусем йĕркеленипе çеç çырлахмаççĕ, ĕçтешсемпе формаллă мар хутшăнусем ирттереççĕ. Çакă савăнтарать. Сăмахран, съезд умĕн делегатсен пĕр ушкăнĕ (унта тележурналистсем кĕнĕ) «Мускав-24» телеканалта пулнă, унти ĕç условийĕсемпе паллашнă.

Юрий СНЕГОПАД.