Май уйăхĕн 31-мĕшĕнче Ĕпхÿре асăннă фондăн филиалĕ уçăлмалла. Çакăн çинчен Пушкăртстан Республикин Пуçлăхĕн администраци ертÿçи Максим Забелин пĕлтернĕ. Фондăн Ĕпхÿри уйрăмĕ республикăри халăха социаллă пулăшу паракан центр çуртĕнче (Мингажев урамĕ, 107) вырнаçнă. Паян Максим Забелин ПР çемье, ĕç тата халăха социаллă пулăшу паракан министрпа Ленара Ивановапа тата республика парламенчĕн депутачĕпе Гульнур Кульсаринапа фонд филиалĕ ĕçе пуçлама хатĕрлĕхне тĕрĕсленĕ.
Максим Забелин Фонд ĕçченĕсем Хусанта ятарлă вĕренÿ курсне иртнине тата вĕсем пурте ĕçе хатĕррине (ятарлă çар операцине хутшăнакансемпе вĕсен çемйисенчи лару-тăрăва уйрăм хак парса пулăшма пултарнине) палăртнă. Филиалăн ĕçне обществăлла организацисемпе пĕрле йĕркелĕç, мĕншĕн тесен вĕсем кама мĕнле пулăшу кирлине тĕпчесе пĕлĕç. Кунта медицина пулăшăвĕ парассипе, çар операцине хутшăнса инвалида юлнă çынсене реабилитаци иртме тата протезсем хатĕрлеме пулăшассипе çыхăннă ыйтусем кĕреççĕ. Çавăн пекех ятарлă психологипе терапи енчен консультаци парассине те шута илнĕ.
Максим Забелин каланă тăрăх, хамăрăн паттăрсене пулăшасси патшалăх политикинче системăллă тата чăн малтан тумалли (приоритетлă) ĕç пулмалла. Тăван çĕршыва хÿтĕленине асра тытса патшалăх вĕсене тивĕçлĕ шайра тата кирлĕ пек тав тумалла, хисеплемелле.
Çакна та палăртса хăвармалла, регионти патшалăх фончĕн структури виçĕ пайран тăрĕ. Кунта медицина, социаллă тата обществăлла проектсем кĕреççĕ.
Юрий СНЕГОПАД.