Шампань эрехне туянасси 45% чакнă

Ĕпхÿри «Контур. Маркет»  аналитика сервисĕ 587 пин чек пăхса тухнă хыççăн Пушкăртстанра 2025 çулхи ноябрь уйăхĕнчен пуçласа декабрь çурриччен шампань эрехне туянасси иртнĕ çулхи çак вăхăтрипе танлаштарсан 45% чакнине пĕлтернĕ. Çав вăхăтрах унăн хакĕ 3% чакнă, 0,7 литршăн 576 тенке çитнĕ.

Çав хушăра регионта виски ытларах туянма пуçланă – туянусен шучĕ 7% ÿснĕ, хакĕ 4% чакнă, 0,7 литршăн 2010 тенкĕпе танлашнă.

Пушкăртстанра  çулталăкра эрех хакĕ 20% ÿснĕ, çур литршăн 555 тенке çитнĕ.  Çав вăхăтра ăна туянасси 47% чакнă.  Сăра хакĕ 20% чакнă,  çур литршăн  хакĕ 258 тенкĕпе танлашнă (кунта тĕрлисем кĕреççĕ, крафт сăрасем те).

Хĕрлĕ эрех хакĕ республикăра  çулталăкра 8%  ÿснĕ, унăн хакĕ 1088 тенке çитнĕ, ăна туянасси 35% чакнă. Коньяк 6% хаклăланнă, çур литршăн 711 тенке çитнĕ, суту-илÿ  59% чакнă.

Республикăра пĕтĕмĕшле алкоголь хакĕ 1% ÿснĕ, туянасси 39% чакнă.