Чăваш арĕ - чи лайăххисен шутĕнче

Чи лайăххисен шутĕнче Донбаса гуманитари пулăшăвне илсе çитернĕ водительсем, Миграци управленийĕн тата Аварипе хăтару службин, Граждансене хÿтĕлекен управленин, Инкеклĕ лару-тăру енĕпе ĕçлекен патшалăх комитечĕн специалисчĕсем пулнине палăртса хăвармалла.
Чыслав церемонине Пелепей тăрăхĕнче паллă Сергей Матвеев та хутшăннă. Сергей Михайлович Пелепей районĕнчи «Раççей Федерацийĕн Пушкăртстан Республикинчи Наци гвардийĕн çарĕсен ведомство тулашĕнчи хурал управлени» федераллă патшалăх учреждени филиалĕн ертÿçи шутланать. Ентешĕмĕр служба тивĕçĕсене тÿрĕ кăмăлпа пурнăçласа тата оперативлă служба ĕçĕ-хĕлĕнче пысăк кăтартусемпе палăрнăшăн республика пуçлăхĕн Тав çырăвне илме тивĕçнĕ. Сăмах май каласан, Сергей Михайлович Çĕнĕ Сименкке ялĕнче 1970 çулхи апрель уйăхĕн 26-мĕшĕнче çуралнă. Вăтам шкул пĕтернĕ хыççăн техникумра ăс пухнă. Унтан çамрăка Милицин ятарлă чаçне салтак тивĕçне пурнăçлама янă. Запаса тухнă хыççăн хăйĕн пурнăçне право йĕркине сыхлакан органсемпе çыхăнтарма шут тытнă. Ăна ведомство тулашĕнчи хурал уйрăмĕн рота милиционерĕ пулма сĕннĕ. Çапла Сергей Матвеевăн пĕрремĕш ĕç кунĕ хыçа юлнăранпа виçĕ теçетке ытла çул иртнĕ. Çак тапхăрта вăл ахаль ĕçлекенрен пуçласа уйрăмăн ертÿçине çитнĕ. Службăра çитĕнÿсем тунăшăн С.М. Матвеева темиçе хутчен Хисеп хучĕсемпе, «Службăра палăрнăшăн» тĕрлĕ степеньлĕ медальсемпе наградăланă.
Эпир Сергей Михайловича черетлĕ çитĕнÿпе чун-чĕререн саламлатпăр. Яланах маттур та хастар пулма, çĕршыв ятне çÿле çĕклеме сунатпăр!
Ирида МАТНИЯЗОВА.
Пелепей хули.