Паян чăваш кăйкăрĕ тĕнче уçлăхне вĕçсе кайнăранпа - 60 çул

«Паян Андрян Григорьевич Николаев пӗрремӗш хут космоса вӗҫнӗренпе 60 ҫул çитрĕ. 11 сехет те 30 минутра ҫӗкленме пуҫланӑ чӑваш каччин карапӗ ҫӑлтӑрсем патне. Ку пулӑм пӗтӗм тӗнчешӗн тата уйрӑмах Чӑваш тӗнчишӗн калама ҫук пысӑк пӗлтерӗшлӗ! Савӑнӑр, паллӑ тӑвӑр, тусӑмсем!» - тесе çырать хăйĕн социаллă сечĕсенче тата Ватсапра чăваш халăх поэчĕ Валерий Туркай.

Валерий Владимирович вĕри те канăçсăр чĕреллĕ çын пулнине пĕлнĕ май унăн шалти туйăмне пире хак пама питĕ те йывăр. Уйрăмах поэтăнне. Анчах та эпир те унпа пĕрле пĕтĕм чăваш халăхĕ çĕкленÿллĕ кăмăлпа хамăрăн çавăн пек космонавт пурришĕн мăнаçланатпăр та савăнатпăр, чăваш кăйкăрĕн çутă сăнарне куç умне кăларса тăрататпăр, асра тытатпăр, унăн уменче пуç таятпăр. Çапах та калас сăмаха Туркай сăввинчи йĕркесемпех вĕçлеме кăмăл пур.

Мухтанма та, тен, пĕлместпĕр,

Андрия, эпир санпа.

Савасса вара саватпăр,

Чи хĕрÿллĕ туйăмпа.

Ытлашши эпир сăпайлă…

Ытлашши çав час-часах…

Кам пĕлет, çапла, тен, кирлĕ?

Кирлĕ, тен, урăхларах?

Кам шутланă та ĕненнĕ,

Хăйĕн вăхăчĕ çитсен,

Чăваш йĕкĕче хăйюллăн,

Тÿпене çĕкленессе.