Пушкăртстанри тăватă хутчен тĕнче чемпионĕ Чăваш Енĕн орденне илме тивĕçнĕ

«Чăваш Республики умĕнчи тава тивĕçлĕ ĕçсемшĕн» ордена СССР ирĕклĕ кĕрешÿ енĕпе тава тивĕçлĕ спорт мастерĕ, 1980 çулти Олимп вăййисен бронза призерĕ, тăватă хутчен тĕнче тата Европа чемпионĕ, «Тăван çĕршыв ывăлĕсем» («Сыны Отечества») Чăваш Енрен тухнисен регионсем хушшинчи офицерсен обществăлла организацин пайташĕ, Раççейри федераллă чăваш наципе культура автономин (ФНКАЧР) Канашĕн членĕ Сергей Григорьевич Корнилаев тивĕçнĕ.

Сергей Корнилаев 1955 çулхи февраль уйăхĕн 20-мĕшĕнче Пушкăрт АССРчи Иглин районĕнчи Чăваш-Кăпавĕ ялĕнче çуралнă. Вăл – чăваш.

Сергей Григорьевич «Ĕçри резервсем» спорт обществишĕн 48 килогрампа танлашакан çăмăл виçе категорийĕнче вăй виçнĕ. Мускавра иртнĕ Олимп вăййисенче бронза выляса илнĕ. Çавăн пекех унăн пухмачĕнче - тĕнче чемпионачĕсен тăватă ылтăн (1977, 1979, 1981, 1982), Европа чемпионачĕсен ылтăн (1984) тата кĕмĕл (1977) медалĕсем.

Спортсмена халалласа паянхи кун турнирсем ирттереççĕ. Çав шутра Иглин районĕнчи Пĕтĕм Раççейри ăмăртура каччăсемпе хĕрсем хушшинче Корнилаев парнине выляттараççĕ, 1987 çултанпа Чăваш Республикинчи Канаш районĕнчи çамрăксем хушшинчи ирĕклĕ кĕрешÿ енĕпе республика турнирĕ иртет тата ытти те.

2015 çулта Сергей Корнилаев «Чăваш Республики умĕнчи тава тивĕçлĕ ĕçсемшĕн» орден-медале илме тивĕçнĕ пулнă. Çав вăхăтра вăл 42№ Олимп резервĕн спорт шкулĕнче (Мускав хули) ирĕклĕ кĕрешÿ уйрăмĕн инструктор-методисчĕ пулса ĕçленĕ.