Пушкăртстанри 2500 ытла çемье амăш капиталĕнчен уйăхсерен паракан тÿлеве илме тытăннă

- Кăçалхи çултан пуçласа виçĕ çул тултарман ачашăн, пĕрремĕшне те шута илеççĕ, амăш капиталĕнчен уйăхсерен илекен тÿлеве тивĕçме май пур, - ăнлантарса панă фондра. – Маларах çемьесем амăш капиталĕнчен паракан тÿлеве иккĕмĕш ача çуралсан çеç илме пултарнă. Çемьере темиçе ача пулсан та пĕр тÿлев çеç панă.  

Уйăхсерен илекен тÿлевĕн хисепĕ регионти ачасен пурăнмалли минимум шайĕпе танлашать. Пушкăртстанри ачасен пурăнмалли минимум шайĕ – 12 271 тенкĕ. Унăн хисепĕ улшăнас пулсан уйăхсерен паракан тÿлев те ылмашĕ.

Тÿлеве  çын пуçне икĕ пурăнмалли минимум шайĕнчен сахалрах  тупăшлă çемьесем тивĕçеççĕ. Енчен те пĕр тÿлев  илсе тăракан çемьере виçĕ çул тултарман тепĕр ача çитĕнет тата çемье тупăшĕ  çын пуçне икĕ пурăнмалли чи пĕчĕк виçинчен иртмест пулсан ашшĕ-амăшĕсем тепĕр ачишĕн тÿлев илме заявлени çырма пултараççĕ. Тÿлев илес тесен кашни ачашăн уйрăм заявлени çырмалла.