Истори чĕрĕлнĕ вăхăт

Январь уйăхĕн 9-мĕшĕнче Давлекан хулинчи Тĕп лапамра тĕрлĕ ăрăва пĕрлештерекен «Шэжэрэ байрам» иртнĕ. Ăна Раççейри халăхсен пĕрлĕхĕн çулталăкне халалласа йĕркеленĕ.

Илемлĕ сцена çинче пилĕк культура тĕл пулнă: Дюртюли салинчи Мавлияровсен çемйи (пушкăрт), Аюхановăри Хайруллинсем (тутар), Рассвет салинчен килнĕ Родинсем (вырăс), Канчăлав ялĕнчи Кузьминсем (чăваш) тата Хотимляри Наталья Васильева (мăшкă).

Кашни çемье пухăннисене хăйĕн йăх-несĕл тымарĕпе паллаштарнă, ăру-тăванлăх йывăççи хатĕрленĕ, курава наци тумĕсем тăратнă, тăван халăхĕн наци апатне пĕçерсе килнĕ, çавăн пекех йăла-йĕркесене те аса илнĕ.

Йĕркелÿçĕсем «Шэжэрэ байрам» мероприятие хутшăнакансене Дипломсемпе сертификатсем парса чысланă.

Ирида НОВИКОВА хатĕрленĕ.
Давлекан хули.