2024 ҫулта 11 спорт объектне юсĕç

Пелепей районĕнче «Чемпион» спорт комплексне тĕпрен юсаççĕ. Халĕ объектăн периметрĕпе бетонран тунă никĕсе çирĕплетеççĕ.Спорт комплексне юсас ĕçе вăхăтра пурнăçламалла. Мĕншĕн тесен вырăнти халăх унта хаваспах çÿрет. Кунсерен спорт комплексĕ тăватă çултан пуçласа 300 яхăн спортсмена йышăнать. Кунта 60 çултан аслăрах граждансем валли уйрăм ушкăнсем те пур.

Спорт министерствинче вырăнти спорт объекчĕсене юсас ĕç муниципалитетсемпе пĕрле пурнăçланнине пĕлтернĕ.

Кăçалхи февраль уйăхĕнче Пушкăртстан Пуçлăхĕ Радий Хабиров Физкультурăна тата спорта аталантарассипе çыхăннă ыйтусемпе ĕçлекен канашăн ларăвĕнче республика спорт инфраструктурине аталантарассине тата строительствăна пысăк тимлĕх уйăрассине çирĕплнетнĕ. Регион ертÿҫи спорт хатĕрĕсемпе объекчĕсем ĕçлемеллине палăртнă.

Çавăнтах Радий Хабиров Пушкăртстана 2030 çулччен аталантармалли стратеги шайĕнче муниципалитетсенчи спорт объекчĕсене çĕнетес енĕпе сĕнÿсем тăратма хушнă.

 - Эпир республикăри районсенче спорт аталанăвне пысăк тимлĕх уйăратпăр. Ку питĕ кирлĕ. Шăпах унта паллă атлетсем çуралаççĕ, - тенĕ регион ертÿçи.

Пушкăртстан пуçлăхĕ республикăра хăпартакан спорт объекчĕсене ачасем тÿлевсĕр çÿремеллине те асăрхаттарнă.

 - Уйрăмах пысăках мар тупăшлă тата спортшăн тÿлеме май çук çемьесене пырса тивекен задачăна туллин пурнăçламалла.  Çакă пирĕн тĕп тĕллев пулмалла. Ăна пурнăçлас тесе тăрăшăпăр, - палăртнă Радий Хабиров.

Юлашки пилĕк çул хушшинче республикăра хута янă спорт объекчĕсен шучĕпе Пушкăртстан малта пыракан регионсен шутне кĕнĕ. Пушкăртстанра паянхи кун тĕлне - 13 пин ытла спорт объекчĕ. Çапла майпа республика вĕсен шучĕпе рейтингра Мускав хыççăн иккĕмĕш вырăн йышăнать.