Ял тренерĕсене пулăшса 134 млн тенкĕ уйăрнă

Проект шайĕнче тăватă çул хушшинче 176 тренер пĕтĕмĕшле 134 млн та 800 пин тенкĕлĕх пулăшу илнĕ тесе пĕлтернĕ ПР правительствин пресс-служби.

Август уйăхĕн 8-мĕшĕнче «Уфа-Арена» спорт комплексĕнче  Физкультура тата спорт ĕçченĕсен кунĕ умĕн семинар-канашлу иртнĕ. Асăннă мероприятие ПР спорт министрĕ Руслан Хабибов, ведомствăна пăхăнакан учрежденисен тата муниципаллă районсемпе хула округĕсенчи физкультурăпа спорт управлени органĕсен ертÿçисем хутшăннă.

Канашлу вăхăтĕнче республикăра пурнăçа кĕрекен «Ял тренерĕ» тата «Хула тренерĕ» проектсен, спорта цифрăлассипе çыхăннă программăсен, муниципаллă пĕрлĕхсен территорийĕсем çинче физкультурăпа спорт ĕçĕ-хĕлĕ епле майпа пурнăçланнин пĕтĕмлетĕвĕсене тунă.  

Мероприяти вĕçĕнче регионти спорт ведомствин ертÿçи районсемпе хуласенчи спортпа туслă 3-79 çулхи граждансене, çавăн пекех «Ял вăййисен» çĕнтерÿçисемпе призерĕсене Хисеп хучĕсем парса чысланă.