Шыв айĕнчи сунарçăсем пысăк шăла пулă тата çуйăн тытнă

Пушкăртстанри шыв айĕнчи спорт федерацийĕ Агидель хулинче 2025 çулхи сезона вĕçленĕ май ăмăрту-фестиваль йĕркеленĕ. Пăхăнман Патшалăхсен Пĕрлешĕвĕнчи (СНГ) шыв айĕнчи сунарçă енĕпе чи опытлă Наиль Аксакал пулăç-сунарçă хăйĕн ăсталăхне кăтартнă – 7 килограмм таякан шăла пулла (судак) тытнă. Çавăн пекех вăл фестивальте шыв айĕнчен пысăкран та пысăк çуйăн (сом) туртса кăларнă.

Командăсем хушшинче пĕрремĕш вырăна Челябинск облаçĕнчен килнĕ «Победа» команда йышăннă. Тутарстанри «Актаныш» иккĕмĕш пулнă. Бронза медаль хуçисем Тутарстанри «Диванные эксперты» команда сунарçисем пулса тăнă.

Фестивальте ятарлă çар операци валли укçа-тенкĕ пухассипе ыркăмăллăх акцийĕ иртнĕ. Çак мероприятинче тытнă мĕнпур пулла килограмне 100 тенкĕпе сутнă. Пушкăртстанри шыв айĕнчи спорт федерацийĕ пурĕ 43 пин тенкĕ нухрат пухма пултарнă.

Юрий СНЕГОПАД.