«Рахмат» акцин пысăк парнисене выляттараççĕ

Римма Бикмурзина пĕлтернĕ тăрăх, сентябрĕн 6-7-мĕшĕсенче йĕркеленĕ тăватă вылявра 150 парне хăйсен хуçисене тупнă. Парнесен шутĕнче – квадроциклсем, мотоциклсем тата офиспа кил-çуртра усă курмалли техника.

Паянхи, вырсарни кунхи, вылявра тепĕр 150 парнен хуçисем паллă пулĕç.

Çавăн пекех Римма Бикмурзина мĕншĕн Ĕпху хулинчен телейлĕ суйлавçăсем нумай пулнине ăнлантарса панă.

- Ĕпхÿ миллион çынлă хула. Çавна пула суйлавçăсем те кунта йышлăрах. Апла пулсан вылявра çĕнтерес шанчăк та нумайрах пулмалла, - тенĕ вăл.

Аса илтеретпĕр, ĕнер «Рахмат» акцин сайт лапамне хаккерсем тапăннă пулнă, çавна пула иккĕмĕш платформа йĕркеленĕ. Унта билетсене регистраци ирттерме пулать.

Маларах эпир Илиш районĕнче çуралса ÿснĕ, халĕ Пушкăрт аграри университетĕнче вĕренекен 20 çулхи Радмир Загидуллин студент квадроцикл выляса илни çинчен пĕлтернĕччĕ.

Юрий СНЕГОПАД.