В.В. Николаев ячĕллĕ шкулта ăшă тĕлпулу иртнĕ

Февраль уйăхĕн 9-мĕшĕнче Авăркас районĕнчи Чăваш Хурамал ялĕнчи В.В. Николаев ячĕллĕ шкулта ятарлă çар операцине хутшăнакан хăюллă та паттăр салтакпа, Игорь Валерьевич Тихоновпа, тĕлпулу иртнĕ. Асăннă мероприятие оборонăпа массăллă уйăхлăх шайĕнче ачасене çарпа патриотизм воспитанийĕ парас тĕллевпе йĕркеленĕ.

Игорь Валерьевич ятарлă çар операцийĕнчи çăмăл мар служба пирки, юлташĕсем çинчен каласа панă. Çар çынни ачасене тăрăшса вĕренме, спортпа туслă пулма, дисциплинăна пăхăнма суннă. Çиччĕмĕш класс ачисем Фашизма хирĕç кĕрешекен çамрăк геройсен кунне халалласа илемлĕ сăвăсем каланă. Вĕренекенсем О.Н. Никитина вĕрентекенпе пĕрле технологи урокĕсем вăхăтĕнче сувенирсемпе амулетсем хатĕрленĕ. Шăпах вĕсене паттăра парнеленĕ. Ăшă тĕлпулу пурте пĕрле сăн ÿкнипе вĕçленнĕ.

Авăркас районĕ, Чăваш Хурамал ялĕ.