Паян – Пĕтĕм тĕнчери тăван чĕлхе кунĕ

Паян, февраль уйăхĕн 21-мешĕ – Пĕтĕм тĕнчери тăван чĕлхе кунĕ. Çак уяв ячĕпе пурне те саламлатпăр. Тăван сăмах вăй-хăвачĕпе çĕнĕ çитĕнÿсем тăвар, йывăрлăхсене çĕнтерсе утăм хыççан утăм малалла тăвар. Тăван чĕлхе илемне тăван çĕртен аякра чухне вăйлăрах туйнине асра тытса тăван чĕлхене юратар, хисеплер, унпа куллен калаçар.

Тӑван чӗлхем! Таса хӗлхем
Парсам пӑлхавлӑ чунӑма.
Пӗр чӑнлӑх, савӑнӑҫ, илем,
Пар ирӗк – ҫутӑрах ҫунма.
Ӗшеннисемшӗн ҫул ҫинче
Эс – шанчӑк ҫӑлтӑрӗ ялан.
Тискер тӑманлӑ каҫсенче
Йыхравлӑ чан пек янӑран.
Ҫунат паратӑн ҫамрӑка,
Ватта чун канӑҫӗ кӳрен.
Сӳнсе кӗлленнӗ кӑмрӑка
Вут кайӑк сывлăшӗ кӗртен…

МИТТА Ваҫлейӗ.

Автор: Юрий Михайлов

Читайте нас