Эпĕ Мускав хулин сывлăшне сывлама пуçланăранпа çичĕ çул çитрĕ. Çĕнĕ хула, çĕнĕ ĕç, çĕнĕ юлташсем – пурнăç таппи кунта пысăк хула шавĕпе иртет. Мускавра чăвашсем тĕрлĕ уявсене, концертсене пуçтарăннине эпĕ пĕлеттĕм, анчах кăмăл-сипет апатне вăхăт уйăрма пĕрре те тÿр килмен. Кăçал пуçласа ентешĕмĕр, Авăркас тăрăхĕнчи Юламан ялĕнче çуралса ÿснĕ поэт-юрăç Алена Силпи чĕннипе икĕ уява лекрĕм: чăваш юрăçин концертне тата тăван чĕлхе уявне халалласа ирттернĕ поэзи тĕлпулăвне.
Уявра пире Альбина Юрату хăйĕн çулăмлă, хавхалануллă пултарулăхĕпе савăнтарчĕ. «Сан яту ман чĕре таппинче», – хĕрÿ туйăмпа вуларĕ хăйĕн сăввисене поэтесса. Уйрăмах юрату çинчен çырнă сăвăсем никама та туйăмсăр хăвармаççĕ. Паянхи куна унăн сăввисемпе 600 юрă хывнă. «Пине çитерме шантартăм юрăçсене», – тет Альбина Васильевна.
Чăн та, Мускавра кашни чăвашах юрлать тесе калас килет. Тунсăх юрлаттарать тесе шÿтлетпĕр эпир. Алена Силпи тĕлпулура икĕ çĕнĕ юрăпа куракансене савăнтарчĕ. «Халĕ тата пилĕк юрă çырăнать», – пĕлтерчĕ вăл пире. Кĕтетпĕр, Алена. Вĕсене кĕркуннехи концертра итлеме май пулĕ.
Тав сăмахне вăхăтлă каламалла теççĕ ваттисем. Тав тесе калас килет уява чĕнекенсене – Аленăпа унăн мăшăрне Олега, уява йĕркелекенсене – Мускаври чăвашсен культура ертÿçине А.П. Смирновăна чăннипех пысăк тав. Чун апачĕсĕр, тăван чĕлхесĕр пурнăç çук.
Татьяна БОЛКОНСКАЯ-НИКИТИНА.
Мускав хули.