Тĕп хулари Пĕрремĕш май уявĕ чăвашсемсĕр иртмерĕ

Паян, май уйăхĕн 1-мĕшĕнче, Ӗпхӳре Машиностроительсен керменӗн лапамӗнче «Ĕпхÿ – туслăх тата пĕрлĕх хули» наци культурисен фестивалӗ иртрӗ. Унта чӑваш культурипе паллаштаракан курав та ӗҫлерӗ. Ăна тĕп хулари Павел Миронов ячӗллĕ чӑваш вырсарни шкулӗн вӗрентекенӗ Вера Тарасова, Ӗпхӳри «Салампи" чӑваш хӗрарӑмӗсен канашӗн ертӳҫи Вера Гаврилова тата "Нарспи" халăх ансамблĕн пултаруллӑ пики Анна Алексеева хатĕрленĕ.

Унсӑр пуҫне пирӗн "Нарспи" фольклорпа этнографи ансамблӗн хастарĕсем (ертӳҫи – ПР тата ЧР тава тивĕçлĕ культура ĕçченĕ Галина Кириллова) концерт программине хутшӑнса уяв программине илем кӳртрӗç, пуянлатрĕç. Нарсписем пухăннă халăха «Вайăра» вокалпа хореографи композицийĕ кăтартса пачĕç.

Савăнăçлă та çурхи кун тивлечĕпе иртнĕ мероприятине Павел Миронов ячӗллĕ чӑваш вырсарни шкулӗн директорӗ Наталья Никитина тата Пушкӑрт Республикинчи Çамрӑксен пĕрлĕхĕн ертӳҫи Станислав Иванов та хутшӑнчӗҫ.

«Уявра кӳлӗ йӗри тавра тӗрлӗ халӑх представителӗсем пулчӗҫ. Çакă чăнах та Ĕпхÿ туслăхпа пĕрлĕх хули пулнине çирĕплетет»,- тесе пӗлтерчӗҫ концерта илсе пыракансем.

Пурне те уяв ячĕпе саламлатпӑр!

Пушкăртстанри чăвашсен Канашĕн пресс-служби.