Анне ăшши

Алхаснă шартлама çанталăк.
Мĕскер ăна, кам иртĕ кăмăлне?
Чÿречесем çинчи шăналăк
Чарма пултарнă-ши хĕл тытăмне?

Сăпка юрри анне юрланă,
Мана лăп-лăп
лăпканă çурăмран.
Çил – вĕрнĕ, шăхăрнă, уланă,
Çурта кĕресшĕн йĕнĕ урамра…

Анне çапла аса илетчĕ
Ача çуратмалли çурт хăтлăхне.
Çав вăхăт куçăма кĕрет халь,
Илсе каять-çке хăйĕн чăтлăхне.

Иртни – аса илÿ хисепĕ,
Катса çиетĕп унăн тĕшшине.
Хĕлле çуралнăран пуль эпĕ
Хаклатăп çынсенчи чун ăшшине.
Геннадий ЧЕЛПИР.