Пелепейĕнчи виçĕ вĕренÿ учрежденине юсĕç

РФ Çут ĕç министерстви 2025-2027 çулсенче «Вĕренĕве аталантарасси» программăпа килĕшÿллĕн хăш вĕренÿ учрежденийĕсенче юсав ĕçĕсем ирттерессине палăртнă.  Асăннă списока Пелепей районĕнчи виçĕ учреждени — 8 № тата 15 № шкулсем, çавăн пекех 30 № «Аленушка» ача сачĕ — кĕнĕ.

«Асăннă çуртсене 60-70-мĕш çулсенчех туса лартнă, вĕсем пирĕн район историйĕн пĕлтерĕшлĕ пайĕ пулса тăнă, вĕсене çĕнĕ сывлăш пама йышăнни савăнтарать. Ачасемпе педагогсем хăтлă та хăрушсăр условисенче пулни пирĕншĕн питĕ пĕлтерĕшлĕ, — палăртнă Азат Сахабиев. — Юсав ĕçĕсене пурнăçлама федераци, республика тата вырăнти бюджетсенчен укçа-тенкĕ уйăрĕç.

2025 çулта 8 №  шкулăн тĕп корпусне тĕпрен юсĕç. Кунта 5-11 классенче 600 ытла ача вĕренет. 15 № пĕлÿ çурчĕ, кăçал 50 çулхи юбилейне паллă тунăскер, 2026-2027 çулсенче çĕнелĕ, 1-7 классенче ăс пухакан 1100 ытла вĕренекене пахалăхлă условисемпе тивĕçтерĕ. Кăçал 45 ҫул тултарнă 30 № «Аленушка» ача садне вара 2027 çулта юсĕç. Кунта çулталăк çурăран пуçласа 7 çулчченхи 222 воспитанник çÿрет, 12 ушкăн ĕçлет.