Чи малтанах шкул директорĕ Игорь Борисов вĕрентекенсене шкул историйĕпе, паянхи лару-тăрупа паллаштарчĕ. Унтан вĕрентекенсем концерт пăхрĕç. Ăна Çемье çулне халалланă: ачасем чăвашла сăвăсем каларĕç, юрăсем юрларĕç, ташăсем ташларĕç.
Семинарăн иккĕмĕш пайĕнче вĕрентекенсем Метепуç шкулĕнче чăваш чĕлхине вĕрентекен Ирина Борисован уçă урокне хак пачĕç. Ачасем урокра чăвашла илемлĕ те хитре калаçма пĕлнине курса савăнчĕç, тĕрлĕ ĕçсем тунине сăнарĕç. Ирина Витальевна ачасене урокра хавхалантарса пычĕ, чăваш халăх педагогикипе усӑ курса вĕрентнине кăтартрĕ. Ярмулай шкулĕнче ĕçлекен Татьяна Алексеева вĕрентекен те хăйĕн вĕрентÿ пултарулăхĕпе паллаштарчĕ.
Семинарăн виççĕмĕш пайĕнче Чăваш чĕлхи кунне мĕнле ирттересси çинчен сăмах пычĕ. Вĕрентекенсем çак уява кăсăкрах та лайăхрах, асра юлмалла йĕркелесси çинчен калаçрĕç, кашниех сĕнÿсем пачĕç.
Пĕтĕмлетсе çакна палăртмала, семинар пурне те килĕшмелле тата усăллă иртрĕ.
Вера АЛЕКСЕЕВА, Пушкăртстан Республикин тава тивĕçлĕ вĕрентекенĕ.
Пелепей хули.