Аграрисемпе инженерсене – ытларах бюджет вырăнĕсем

Валерий Фальков министр пĕлтернĕ тăрăх, РФ Наука тата аслă пĕлÿ министерстви çитес вĕренÿ çулĕнче аслă шкулсенче техника тата ял хуçалăх енĕпе бюджет вырăнĕсен шутне ÿстерме палăртать.

Бюджет вырăнĕсен калăпăшĕ иртнĕ шайрах юлĕ – 620,5 пин вырăн, вĕсенчен 371-шне бакалавриатпа специалитетăн куçăн программисем йышăнĕç. Çакă нумайăшне аслă пĕлÿ илме май парать.

Уйрăм тимлĕх регионти аслă шкулсене уйăрĕç: бюджет вырăнĕсем 73,4% çити ÿсĕç, çакă вырăнти студентсене тÿлевсĕр вĕренме ытларах май парĕ.

В.Фальков хăш-пĕр пĕлтерĕшлĕ отрасльсемпе бюджет вырăнĕсен шучĕ ÿснине палăртнă: инженери специальноçĕсемпе – хушма 1169, ял хуçалăх профессийĕсемпе – 594, медицина специальноçĕсемпе – 166 вырăн. Тÿлевсĕр вырăнсен шучĕ ÿсни математикăпа естествăлла наукăсене те пырса тивнĕ.

РФ Наука тата аслă пĕлÿ министерстви регионти аслă шкулсене çакна асăрхаттарнă: специальноçсене суйласа илнĕ чух ĕç рынокĕ ыйтнине шута илме тата вĕренÿ программи промышленность требованийĕсемпе килĕшсе тăнине сăнаса тăма ыйтнă.

Халĕ пирĕн MАХ мессенджерта официаллă канал пур! Унта web.max.ru/-687399910... каçăпа куçма пулать.