2025 çулта Чекмагуш районĕнчи 12 шкул çĕнĕ оборудовани илнĕ

Специалистсем шкулти ĕç тата пуҫламӑш ҫар хатӗрленӗвӗн кабинечӗсен хатĕрĕсене çĕнетнĕ. Улшăнусем «Хăрушсăрлăх тата Тăван çĕршыв хÿтĕлевĕн никĕсĕ» кабинечĕсенче пулса иртнĕ. Практика занятийĕсем валли Калашников автомачĕсем тата Макаров пистолечĕсем, граната-тренажерсем, хÿтĕлев костюмĕсем тата противогазсем туяннă. Пирвайхи пулăшу памалли хăнăхусене вĕренме сурансен имитаторĕсене илсе килнĕ.

Çавăн пекех ĕç мастерскойĕсем те çĕнелнĕ. Йывăçпа ĕçлемелли верстаксем, йывăç çинче çунтарса ÿкерчĕк тумалли приборсем тата кăткăсрах ĕçсене пурнăçламалли лазер станокĕсем, хальхи çĕвĕ машинисем, изделисене виçсе пăхма манекенсем туяннă.

«Çакăн пек хатĕрсем пурри ачасене учебниксемпе вĕренме çеç мар, арçынсемпе хĕрарăмсен чăн ремеслисене алла илме май парать. Кашни вĕренекенĕн хăйĕн пултарулăхне аталантарма, лайăх техникăпа ĕçлеме май пултăр тесе район 2026 тата 2027 çулсенче шкул кабинечĕсем валли оборудовани туянас ĕçе малалла тăсĕ», - тенĕ Чекмагуш район вĕрентÿ уйрăмĕн заведующийĕ Ильнур Насибуллин.

«Çамрăксем тата ачасем» наци проекчĕ  ачасен пултарулăхĕсене аталантарма тата çамрăксене пурнăçра хăйсен вырăнне тупма майсем парать. Наци проекчĕн никĕсне шкулсене хăпартасси тата юсасси, педагогсен квалификацине ÿстересси, çĕнĕ вĕрентÿ методикисене тата вĕренÿ валли хăтлă условисем тăвасси кĕреççĕ. Наци проекчĕ тĕнче шайĕнчи кампуссен сетьне аталантарассине тата аслă шкулсене «Приоритет - 2030» программăпа пулăшассине те шута илет.