Çăмарта хăпартмăшĕ – наци апачĕ

Январь уйăхĕнчи сивĕ кунсенчен пĕринче Çтерлĕри чăваш наципе культура автономийĕн пайташĕ, председателĕн çумĕ Людмила Маркина хăйĕн тăван шкулĕнче, Авăркас районĕнчи Шланлă ялĕнче, чăваш наци апачĕ «Çăмарта хăпартмăшĕ» пĕçерессипе мастер-класс ирттернĕ.

Ĕлĕк ăна чăвашсем пысăк уявсем (Мăнкун, Çимĕк, Кĕр сăри тата ытти те) вăхăтĕнче çеç пĕçернĕ. Паллах, хальхи пек духовкăра мар, кăмакара хатĕрленĕ. Паянхи кун наци апат-çимĕçĕ манăçа тухса пырать, ăна час пиçекен апатсем улăштараççĕ. Хуласенче пурăнакан çамрăксем вара хатĕр апат туянассине мала хураççĕ.

Чăваш хастарĕ Людмила Ивановна ирттернĕ мастер-класа 8-мĕш класс ачисем, тăван чĕлхе учителĕ тата мероприятие йĕркелекен Н.Н. Васильева, ытти вĕрентекенсем, культура çурчĕн ĕçченĕсем хутшăннă.

Мастер-класс ăнăçлă иртнĕ, апачĕ тутлă пулса пиçнĕ.

ЧНКА пресс-служби.
Çтерлĕ хули.