Туймазăра «Пушарçăсемпе çăлавçăсен» палăкне уçнă

Туймазă хулинчи Геройсен аллейинче пушарçăсемпе çăлавçăсене халалласа палăк уçнă. Çăлса хăварнă ачана алли çинче тытса тăракан пушарçă композицин тĕп элеменчĕ пулса тăрать. Палăк пĕрлĕхпе паттăрлăха, тивĕçе чунтан парăннине сăнласа парать.

Асăннă композицие уçассипе çыхăннă церемоние ПР Правительствин премьер-министрĕн çумĕ Ирек Сагитов тата Туймазă район администрацийĕн пуçлăхĕ Булат Мусин хутшăннă. Вĕсем палăк пысăк пĕлтерĕшлĕ пулнине палăртса хăварнă. Çавăн пекех пухăннисен умĕнче РФ Инкеклĕ лару-тăру министерствин Пушкăртстан Республикинчи Тĕп управлени ертÿçин тивĕçĕсене вăхăтлăха пурнăçлакан Эдуард Идрисов тата Раççейри Инкеклĕ лару-тăру министерствин Пушкăртстанри ветеранĕсен Канашĕн председателĕ Валерий Марванов тухса сăмах каланă.

Палăка уçма Ирек Сагитова, Булат Мусина, 12-мĕш пушарпа çăлавçă отрячĕн ветеранĕсене Руслан Миндияровпа Николай Федорова ирĕк панă.

Мероприяти вĕçĕнче Эдуард Идрисов 12-мĕш пушарпа çăлавçă отрячĕн уйрăм йышне медальсемпе тата кăкăр çине çакмалли паллăсемпе наградăланă. Валерий Марванов ветерансене «Инкеклĕ лару-тăру министерствин ветеранĕ» тата «Фронта пулăшу» медальсем парса чысланă.

Скульптурăна тимĕрпе бетонран тунă, унăн виçи 1 200 килогрампа танлашать. Авторĕ – Магнитогорск хулинчи Сергей Елкин скульптор. Палăка Туймазăри пушарпа çăлавçă гарнизонĕн ĕçченĕсемпе ветеранĕсен пуçарăвĕпе тунă. Вăл республикăн 8 районне пушар хăрушсăрлăхĕпе тивĕçтерĕ.