Ăçта йăла-йĕркесене тытса пыраççĕ, унта хаваслă пурăнаççĕ

Чăваш халăхĕ ĕмĕр-ĕмĕр хăйĕн йăли-йĕркисене хисепленĕ, упранă, ăруран ăрăва типтерлĕн парса пынă. Шăпах çак пуян еткерлĕхе сыхласа хăварас тĕлĕшпе Чекмагуш районĕнчи Юмаш ялĕнчи нумай функциллĕ культура çуртĕнче «Ăçта йăла-йĕркесене тытса пыраççĕ, унта хаваслă пурăнаççĕ» фольклор программи йĕркеленĕ.

Мероприятие хутшăнакансем чăваш культурин илĕртÿллĕ тĕнчине çул çÿреве кайнă. Кунта вĕсем чăваш халăхĕн авалхи кулленхи пурнăçĕпе паллашнă. Фольклор программине ертсе пыракансем мăн асатте-асаннесем мĕнле савăт-сапапа усă курни, кăмака мĕн тума кирлĕ пулни, хăйсен аллисемпе хатĕрленĕ пукане-управçăсем çинчен каласа панă. Ачасенче уйрăмах кашни пуканен хăйĕн пĕлтерĕшĕ пулни, вĕсем çемьене усалтан сыхлани пысăк интерес çуратнă.

Хăнасене чăваш халăх алăсталăхĕсемпе, авалхи уявсен тата туй йăли-йĕркисемпе паллаштарнă, вĕсем хăйне евĕрлĕ те тарăн пĕлтерĕшлĕ пулнине çутатса пама тăрăшнă. Калаçу вăхăтĕнче чăвашсен культури пуян, фольклорĕ интереслĕ, историйĕ нумай ĕмĕрлĕ, йăла-йĕркесем нумай енлĕ пулнине çирĕплетсе панă. Çак пĕлÿ пирĕн несĕлсемшĕн хăйĕн хаклăхне çухатмасăр ăруран ăрăва куçса пырать.

Фольклор программи хамăр халăхăн йăли-йĕркисене аса илнипе вĕçленнĕ. Мероприятие хутшăнакансем юрă-кĕвĕ картине тăнă, авалхи чăваш вăййисене аса илнĕ. Çакăн йышши тĕлпулусем кĕнекери историпе паллашнисĕр пуçне, ăрусен çыхăнăвне туйса илме, йăласене хисеплени пурнăçа илемлĕрех тума пулăшаççĕ. Асăннă мероприяти «ăçта йăла-йĕркесене тытса пыраççĕ, унта килĕшупе пĕрлĕх, хаваслăх хуçаланаççĕ» тенине тепĕр хут çирĕплетнĕ.

Чекмагуш районĕ, Юмаш ялĕ.