Çичĕ качака путекĕ çинчен калакан юмах пурнăçа кĕнĕ

Вун пилĕк çула яхăн качака ĕрчетекен фермер каланă тăрăх, хуçалăхра çакăн пек пулăм пирвайхи хут пулса иртнĕ.  

 - Качака март уйăхĕн 21-мĕшĕнче пăранларĕ. Путеккисем темиçе пуласси малтанах паллăччĕ, хырăмĕ питĕ пысăкчĕ. Феньăна çăмăл пулмарĕ, пулăшмалла пулчĕ, путексен пичĕ-куçĕ çинчи пленкăна илсе пăрахрăм, вăйсăррисене сăтăркаларăм, юлашки вара пурнăç паллисемсĕр çут тĕнчене килчĕ. Çапла ултă путек ырă-сывă ÿсеççĕ. Вĕсен шутĕнче икĕ така тата тăватă  путек. Путексем шурă тĕслĕ, пĕри çеç ула-чăла, - тенĕ Олег  Владимирович.