Чăваш тĕрри – чи пуян ÿнерсенчен пĕри

Çак иксĕлми пуянлăха упраса хăварас тĕллевпе Авăркас районĕнчи Нукасак ялĕнчи культура çуртĕнче вырăнти шкулта ăс пухакан ачасем валли чăваш тĕррине тĕрлессипе мастер-класс ирттернĕ.

Ялта пурăнакан тĕрĕ ăсти Надежда Степанова ертсе пынипе ачасем чăваш тĕррин йăлисемпе, эрешĕсемпе тата вĕсен пĕлтерĕшĕпе паллашнă. Хĕр ачасем «хĕресле» тĕррĕн вăрттăнлăхĕсене алла илме тăрăшнă. Çав вăхăтрах вĕсем Надежда Михайловна хатĕрленĕ чăваш хĕрарăмĕн çи-пуçĕпе интересленнĕ. Мастер-класа хутшăнакансем хаваспах масмак, тухья тата хушпу тăхăнса пăхнă. Мероприяти туслă та ăшă лару-тăрура иртнĕ.

Авăркас районĕ, Нукасак ялĕ.