Конкурсăн пĕтĕмлетĕвĕсем тăрăх, Пушкăртстан çыннисем ытларах хăйсен сассисене Мечетлĕ районĕнчи Олокул çăлкуçшăн панă. Унсăр пуçне Пушкăртстанри тата 3 çăлкуçа та палăртнă. Çав шута Ермеккей тăрăхĕнчи «Шурă чул» («Белые камни»), Иглин районĕнчи «Лемезинский» («Теплый» ключ), Çтерлĕпуçĕнчи «Кундряк» çăлкуçсем кĕнĕ. Вĕсене тирпей-илем кĕртме Вырăс географи пĕрлĕхĕн Пушкăртстан Республикинчи уйрăмĕ укçа-тенкĕ уйăрĕ.
Ермеккей районĕнчи «Шурă чул» çăлкуçшăн сасăланă çынсене тав тăватпăр. Мала тухмасан та эпир хамăр çинчен пĕлтертĕмĕр, пулăшăва тивĕçрĕмĕр. Хальлĕхе ял çыннисем асăннă çăлкуç таврашĕнче тирпей-илем кĕртессипе хăйсен вăйĕпе субботниксем ирттереççĕ. Кăмăл пулсан тăп-тăрă çăлкуçсем тапса тăракан çут çанталăкăн илемлĕ вырăнне пырса курăр, сиплĕ шыва тутанса пăхăр.
Инга АЛЕКСЕЕВА.
Ермеккей районĕ, Янăшма ялĕ.