Май уйăхĕн 4-мĕшĕнче «Торатау» геопаркăн визит-центрĕ умĕнче этнокомплекс уçăлнă. Пушкăртстан Пуçлăхĕ Радий Хабиров хăйĕн социаллă сечĕсенче каласа панă тăрăх, вăл ултă пушкăрт юртинчен тăрать.
Туристсем этнокомплексра Пушкăртстанри йăла-йĕркесемпе паллашма, сувенирсем туянма, апатланма, каç выртма пултараççĕ. Асăннă комплекс ЮНЕСКО геопаркĕсен пĕтĕмĕшле сетьне кĕрет.
- Халĕ геологи музейĕн филиалĕ çинчен шухăшлатпăр. Пирĕн пухмачра çынсене кăтартмалли интереслĕ объектсем чылай, - малашлăх планĕсем пирки социаллă сетьсенче каласа панă Радий Хабиров.
Астутарасшăн, Пушкăртстанра Салават районĕнче ЮНЕСКО геопарксен пĕтĕмĕшле сетьне кĕрекен, тĕнче статусне илнĕ «Янган-Тау» геопарк пур.