Авăркас районĕнче историпе культура центрĕ уçăлнă

Çĕнĕ чăваш историпе культура центрĕ Толбазă ялĕнче Пушкăртстан Республикинчи Халăхсен туслăх çурчĕн филиалĕ пек ĕçлĕ. Район администрацине историпе культура центрне пулăшу пама хушнă. Документпа килĕшÿллĕн тăкаксене республика хыснипе ытти çăлкуçсенчен саплаштарĕç.
Ĕçе правительствăн пĕрремĕш вице-премьерĕ – ПР экономика аталанăвĕпе инвестици политикин министрĕ Рустам Муратов сăнаса тăрĕ.
Авăркас районĕнчи Толбазă ялĕнче чăваш историпе культура центрĕ уçăласси пирки ПР Пуçлăхĕ Радий Хабиров районăн хисеплĕ гражданинĕпе, ПР тава тивĕçлĕ строителĕпе, хăй вăхăтĕнче Чăваш Енĕн Пушкăртстан Республикинчи полномочиллĕ представителĕ пулнă Георгий Орловпа тĕл пулнă май пĕлтернĕччĕ.
Надежда РОДИОНОВА.