Кайраклăсем астăвăма тимлĕ упраççĕ

Вăрçă паттăрĕсене халалланă палăксем – çĕр çинчи тăнăç пурнăçшăн мĕнле хак тÿлеме тивнин паллисем. Вĕсем пирĕн чун-чĕрере, ăс-тăнра упранакан астăвăм. Çынсен ырлăхĕшĕн хăйсен пурнăçĕсене шеллемен паттăрсен ячĕсене паянхи, малашнехи ăрусем сăваплăн упрама тивĕçлĕ.

1984 çултан пуçласа апрель уйăхĕн 18-мĕшĕнче Пĕтĕм тĕнчери палăксен, истори пĕлтерĕшлĕ вырăнсен кунне паллă тăваççĕ.

Элшей районĕнчи Кайраклă ялĕнче пурăнакансем хаваспах астăвăм датипе çыхăннă акцие хутшăннă. Ял çыннисем «Астăватпăр. Юрататпăр. Хурланатпăр» асăну палăкĕн территорине çÿп-çапран тасатас тата ăна хăтлăх кÿрес тĕлĕшпе субботник йĕркелесе ирттернĕ.

Субботника хутшăнакансем аллисене ĕç хатĕрĕсем тытса туслăн та кал-кал ĕçленĕ, ывăннине пăхмасăр кÿлĕннĕ ĕçе пăрахман, вĕçне çитернĕ. Пĕрлехи ĕçĕн кăтартăвĕ пурне те савăнтарнă. Мĕншĕн тесен кашнийĕ чун ăшшине шеллемесĕр, чĕререн савăнса тăрăшнă.

Истори пĕлтерĕшлĕ вырăнсене хăтлăх кÿни - таса та кăвак мирлĕ тÿпе пултăр тесе пуç хунисене тав туни. Пирĕн тĕп тĕллев вăл астăвăма упрасси пулса тăрать.

Элшей районĕ, Кайраклă ялĕ.