Шаран районĕнчи кинемей 100 çулхи юбилейне паллă тунă

Шаран районĕнчи Дюрмен ялĕнче пурăнакан Назия Гиниятуллина хăй çуралнăранпа 100 çул çитнине кĕтсе илнĕ. Ăна çак паллă кунпа саламлама вырăнти администраци ĕçченĕсем килсе çитнĕ, вĕсемех РФ Президенчĕ Владимир Путин тата Пушкăртстан Пуçлăхĕ Радий Хабиров ятĕнчен ăшă сăмахсем каласа тата парнесем парса чысланă. Çавăн пекех Чалмалин ял хутлăхĕнчи «Ак чишма» («Шурă çăлкуç») халăх ансамблĕн хастарĕсем юбиляр валли ятарлă концерт программи йĕркеленĕ.

Назия Гиниятуллина Шаран районĕнчи Улек-Елга ялĕнче 1925 çулхи июнь уйăхĕн 15-мĕшĕнче çуралнă. Мăшăрĕпе, Тăван çĕршывăн Аслă вăрçине хутшăннă Амир Гиниятуллинпа, вĕсем пилĕк ача çуратса çитĕнтернĕ. Паянхи кун ăна сакăр мăнукĕпе вун икĕ кĕçĕн мăнукĕ тивĕçлĕ тимлĕх уйăраççĕ, савăнăç парнелеççĕ.

Юрий СНЕГОПАД.