Силпи юхан шывĕ хăрушлăха лекнĕ

- Икĕ-виçĕ кун каялла юхан шыв кăпăкланнине куртăмăр, анчах та эпир ун çине пысăк тимлĕх уйăрман. Виçĕмкун ял çыннисем пăрăхран хăй тĕллĕн хире темле шĕвек юхса тухнине асăрханă. Эпир çав вырăна çитрĕмĕр, ун чухне нимĕн те юхмастчĕ, çапах та çăра шĕвек типсе çитменччĕ,- каласа парать пулса иртнине курнă çын.

Çавăн пекех çак вырăнта пурăнакансем юхан шывра пулăсем вилнисĕр пуçне çырмаран кăмăллă мар шăршă кĕнине палăртаççĕ. Çакăн пек пулăмпа  красноярсем пĕрремĕш кун çеç тĕл пулмаççĕ. Пирĕнпе калаçакан çын пĕлтернĕ тăрăх, сысна ферми çывăхра вырнаçнине пула ялти пÿртсенче сывлăша уçăлтарма чÿречесене уçма май çук.

- Киревсĕр шăрш пирки калама та кирлĕ мар. Çывăхри ялсенче сывлама йывăр. Çĕрле чÿречесене уçса хураймастăн, усал шăршă кĕрет. Шел пулин те пăсланнă нÿр сывлăмпа хирсенчи тыр-пул çине ÿкет. Эпир шыв тата сывлăш тĕрĕслевĕ ирттерме ыйтса çыртăмăр, анчах та пирĕн пата çитиччен лару-тăру улшăнма та пултарать, - пĕтĕмлетрĕ хайĕн калаçăвне Краснояр çынни.

Хальхи вăхăтра Силпи тăрăхĕнчи лару-тарăва тĕпчесе уçăмлатас ыйтупа  Пушкăртстанри Экологи министерствине тухнă. Ведомство специалисчĕсем вырăнта ĕçлеççĕ. Унта мĕн пулса иртнине каярах пĕлтерме шантараççĕ.

Юрий СНЕГОПАД.