Кашни йывăç уйрăм çар паттăрĕн сăнне аса илтерĕ

Акă, иртнĕ эрнере Пелепей тăрăхĕнчи Слакпуç ялĕнче «Багратион» çар операци иртнĕренпе 80 çул тата Совет Союзĕн Паттăрĕ Николай Павлов çуралнăранпа 103 çул çитнине халалласа унăн тата Тăван çĕршывăн Аслă вăрçинче вилнисен паркĕнче йывăçсем лартассине йĕркелерĕç. Унта шкул ачисемпе вĕрентекенсем, ял çыннисем тата сумлă хăнасем хутшăнчĕç.
Акци пуçланиччен Николай Спиридоновичăн бюсчĕ патĕнче митинг иртрĕ. Пухăннă халăх умĕнче ПР Патшалăх Пухăвĕн депутачĕ Салават Харасов, Пелепей районĕнчи депутатсен Канашĕн секретарĕ Артур Садыков, Пушкăртстанра ирĕклĕ майпа йĕркеленекен батальонсен Тĕп штабĕн ертÿçи Борис Гордеев полковник, Пелепей районĕнчи ветерансен Канашĕн председателĕ Александр Буйлов, районти чăвашсен наципе культурин автономин пуçлăхĕ Владимир Яковлев тухса сăмах каларĕç, патриотизмла воспитани парас тата çынсен ăс-тăнĕнче паттăр салтаксене асра тытас енĕпе чылай ĕçсем тăвакан хастарсене Пелепей район администрацин Хисеп хучĕсемпе, ПР Патшалăх Пухăвĕн Тав çырăвĕсемпе чысларĕç. Владимир Яковлев вара РФ Хÿтĕлев министерствин «Инженери тĕллевĕсене пурнăçлас ĕçре тăрăшнăшăн» («За усердие при выполнении задач инженерного обеспечения») медале тивĕçрĕ. Ăна Владимир Матвеевича Раççей инженери чаçĕсене çапăçăва хатĕр пулма пулăшас ĕçре пуçарулăх тата тăрăшулăх кăтартнăшăн панă.
Митинг хыççăн Çĕнтерÿ аллейинче пурте пĕрле чăрăшсем лартрĕç. Вăл пурăна-киле вăрçăра пулнă пирĕн паттăр салтаксене аса илтерĕ, пуçра ырă та кăмăллă, çав вăхăтра йывăр çулсемпе çыхăннă хурлăхлă астăвăма упрама пулăшĕ. Кашни йывăç уйрăм çар паттăрĕн сăнарĕ пек куç умне тухса тăрĕ.
Юрий СНЕГОПАД. Пелепей районĕ.