Тавралăха илем кÿртес ĕçре кашни хăй тÿпе хывать

Ишимбай районĕнчи Йĕкенпуç ялне пилĕк çул каярах вырăнти пуçаруçă Роза Андреева вăйĕпе хăпартнă часавай илем кÿрет. Шăмат кунсенче Турă çуртĕнче служба ирттерме Ишимбай хулинчен Дионисий атте килсе çÿрет. Кашни çул август уйăхĕн 15-мĕшĕнче кунта Çвяттуй Василий Блаженнăй кунне уявлаççĕ.

Кĕл тумалли çурт тавра клен йывăçĕсем çеç ÿсни Роза Васильевнăна тахçанах канăç паман. Çавăнпа та вăл çине тăрса, ял Канашĕнчен ирĕк илсе çав вырăна хырсем лартма шутланă. Таврари йывăçсене касса тĕплес ĕçе Олег Иванов, Вадим Иванов тата Владимир Клеин пурнăçланă. Красноусольскинчи Николай Алексеев вăрман ĕçченĕ хыр калчисемпе тивĕçтернĕ. Икĕ кун хушшинче, октябрь уйăхĕн 2 тата 6-мĕшĕнче, Наталья Андреевапа Раиса Иванова, Нина Клеинапа Лидия Филиппова, Елена Ивановапа Елена Васильева, Олег Андреевпа Владимир Андреев, Вера Филипповапа Ирина Николаева, Лиля Семеновапа Дарья Семенова вырăнти аслă ăрури çынсем, Надежда Филипповапа Алена Семенова клубпа библиотека ĕçченĕсем, Виталий Никитинпа Сергей Карюгин, Александр Агафоновпа Семен Иванов çамрăксем çĕре яхăн хыр лартнă. Халĕ ял çыннисем çамрăк хунавсем чĕрĕлччĕр тесе вĕсене шăварса тăраççĕ.
Вăхăт иртнĕçем хыр хунавĕсем çÿллелле хăпарĕç, ял сăн-сăпачĕ тата та илемленĕ. Вырăнти çынсем туса ирттернĕ пархатарлă ĕç вара ĕмĕрлĕхе юлĕ.
Инга АЛЕКСЕЕВА.
Ишимбай районĕ, Йĕкенпуç ялĕ.