Пĕр пусран миллион тенкĕлĕх йĕркеленĕ сад

Пĕрремĕш чечек йăранĕсене Англире тата Францире XVI ĕмĕрте йĕркеленĕ. Вĕсене пуян çынсем çеç тума пултарнă. Чечексем улпут хуçалăхĕсен картишĕсене илем кÿнĕ, тăтăшах композицисене гранат тата мандарин йывăççисем лартнă вазăсемпе пуянлатнă. Майĕпен ландшафт дизайнĕ аталаннă, унпа ыттисем те усă курма пуçланă. 1838 çулта Великобританире йăрансем çинче ÿсекен чечексен пĕрремĕш куравĕ иртнĕ.

Халĕ сире чечек йăранĕсем тăвас умĕн çак йĕркесемпе тата сĕнÿсемпе паллашма сĕнетпĕр:

Сад-пахчари территорине хак парăр, унта хĕвел айĕнче е сулхăмра ÿсекен ÿсен-тăрансем лартассине палăртăр.
Йăрансем валли нумай çул ÿсекеннисене суйламалла, вĕсен хушшинчи пушă вырăна чечексемпе пĕр çул савăнтаракан культурăсене лартмалла. Çакă чечек йăранĕсене çултан çул тĕрлĕ те пуян тума май парĕ.
Ытларах çăвĕпе чечекре лараканнисемпе усă курăр. Вĕсем сезон тăршшĕпе куçа илем кÿрĕç. Унсăр пуçне пĕрин хыççăн тепри çуракан чечексен пуххисене те акма-лартма пулать – июнь уйăхĕнче пĕрисем, июльте теприсем, августра виççĕмĕшĕсем чечеке ларĕç. Çапла майпа чечек композицийĕ 3 уйăх хушши йăлăхтармасăр çынсене савăнтарĕ.
Ÿсен-тăрансен шутне мăшăрлă мар виçепе вырнаçтарăр, анчах виççĕрен кая мар. Сăмахран, 5, 7, 9 тата ытти те. Тĕрлĕ чечексен пуххи пĕчĕк йăран çинче те илемлĕ курăнать.

Йăрансене вĕçен кайăксен сырăшĕсемпе е шыв ĕçмелли савăчĕсемпе илемлетĕр, вĕсем те сирĕн çут çанталӑк композицийĕн пĕр пайĕ пулса тăрĕç. Çавăн пекех сада пуянлатма скульптурăсемпе, фонтансемпе е çакмалли кашпосемпе усă курма пулать.

Сирĕн умăрта – хăмасенчен çапса тунă чечек йăранĕсем.