Ĕçĕпе – мухтавлă, чунĕпе – пуян

Вăл 1936 çулхи сентябрĕн 12-мĕшĕнче Михеевсен нумай ачаллă ҫемйинче Çĕнĕ Александровка ялĕнче çуралнă. Вăрҫă хыççăнхи хаяр çулсене кинемей чĕтрекен хурлăхлă сассипе аса илет: кÿршĕри Васильевка ялне вĕренме çуран мĕнле çÿренине, йывăр та выçлă-тутлă пурăннине. Зинаида Афанасьевна 6 класс пĕлĕвне çеç илнĕ.
Шкул хыççăн мĕн тивĕçлĕ канăва тухиччен вăл «Красно-Полянский» совхозра тĕрлĕ ĕçре вăй хунă: çулла – хирте, хĕлле – фермăра. Ĕçлеме хĕрарăм Владимировкăна çуран çÿренĕ. Михеевсен хĕрĕ тăрăшуллă та ĕçчен пулнă, производствăра лайăх кăтартусем тунă, совхоз ертÿçисенчен наградăсем илме тивĕçнĕ.
1955 çулта Зинаида Афанасьевна хăйĕн юратăвне тĕл пулнă: пĕр ял çыннипе Вениамин Анисимовичпа пĕрле çирĕп çемье çавăрнă. Çемье пуçĕ фермăра осеменатор пулса ĕçленĕ. Шел, Вениамин Анисимович 1980 çулта пурнăçран уйрăлса кайнă. Павловсем виçĕ хĕре пурнăç парнеленĕ, тивĕçлĕ воспитанипе вĕрентÿ парса çитĕнтернĕ. Татьяна хĕрĕ хăйĕн çемйипе Шупашкар хулинче пурăнать, вăл тивĕçлĕ канăва тухнă. Галина хĕрĕ чикĕ леш енче тымар янă. Кĕçĕнни, Людмила, кÿршĕри Владимировка ялĕнче никĕсленнĕ, вăл та пенсионерка. Людмила Вениаминовна час-часах ватă амăшĕ патне килсе çÿрет.
Зинаида Афанасьевна – лăпкă, ырă, уçă кăмăллă, ĕçчен хĕрарăм. Вăл сывлăхлă пурнăç йĕркине пăхăнать. Çулĕсем самаях пулин те, çуркуннерен пуҫласа кĕр кунĕсем çитичченех килĕнче пурăнать, хĕллене Людмила хĕрĕ хăйĕн патне пурăнма илсе каять.
Кинемее пилĕк мăнукпа виçĕ кĕçĕн мӑнук пурри пысăк савăнăç парнелет. Çу кунĕсенче вăл ытларах уçă сывлăшра пулма тăрăшать, чăх-чĕпсене апатлантарать. Хĕлле хăйĕн юратнă мăнукĕсем валли ăшă чăлхасем çыхать, хаçат-журналсем вулама юратать.
Анжела АТНАКАЕВА, Писаревски ял хутлăх администрацийĕн ĕçĕсен ертÿçи.
Шаран районĕ.