Пур хыпар та
Кун-çул каçалăкĕ
20 Нарӑсӑн , 15:00

Ватлăх килте кĕтсе илеймĕ

Шаран районĕнчи Наратастă ялĕнче пурăнакан ветеринари службин ветеранĕ Владимир Егоров тăхăр теçеткерен иртнĕ пулин те тулли та хастар пурнăçпа пурăнать. Владимир Андреевич хăйĕн пурнăçне ветеринари службине халалланă – 30 çул ытла. 92 çулхи сумлă ватă çуран нумай çÿрет, хуçалăх тытать.

Ватлăх килте кĕтсе илеймĕ
Ватлăх килте кĕтсе илеймĕ

Владимир Егоров Хурамал ялĕнче çуралса ÿснĕ. Ашшĕ Андрей Николаевич «Мичуринский» совхозра тĕрлĕ ĕçре тăрăшнă, 1941 çултан пуçласа 1945 çулччен вăл Аякри Хĕвелтухăçĕнче службăра тăнă. Анна Семеновна амăшĕ килти хуçалăха илсе пынă. Мăшăр ултă ача çитĕнтернĕ, Владимир вĕсенчен чи асли пулнă.
Акбарисово шкулĕнчен вĕренсе тухнă хыççăн Владимир Егоров Хурамал шкулĕн пуçламăш класĕсенче ĕçленĕ. 1953 çулта вăл Пушкăрт ял хуçалăх институтне ветеринари факультетне вĕренме кĕнĕ. Аслă шкул пĕтернине çирĕплетекен диплома алла илсен çамрăк специалист Мичуринри ветеринари станцийĕн ертÿçин тивĕçне пурнăçлама пикеннĕ. Вăл çичĕ колхоза, «Мичуринский» совхоза, Мичурински ял Канашне кĕрекен 48 яла пăхса тăнă. Ветеринарипе çыхăннă канăçсăр ĕç унăн кăмăлне кайнă. Владимир Андреевича çĕрле те вăратма пултарнă. Васкавлă самантсенче вара вăл ниме пăхмасăр пулăшу пама тухса утнă. 1960 çулта пултаруллă, ĕçчен тата тăрăшуллă специалиста Шаран районĕнчи ветеринари станцине ĕçлеме чĕнсе илнĕ. Çĕнĕ вырăнта ĕçĕ питĕ нумай пулнă. Ун чухне районта 28 выльăх-чĕрлĕх, 12 сысна тата 80 кайăк-кĕшĕк ферми ĕçленĕ.
– Астăватăп, çумăрта та, юр çунă чухне те, çулла та, хĕлле те эпĕ Шаран районĕнчи ял-саласене тухса каяттăм. Транспорт яланах пулман, çула май каякан машинăсемпе ларса кайма тиветчĕ. Анчах эпĕ нихăçан та кая юлса килмен, ялан вăхăтра çитнĕ, – каласа парать сумлă ватă.
Районти ветеринари станцинче 34 çул службăра тăнă чух Владимир Егоров тĕрлĕ тĕп ветеринари тухтăрĕсемпе ĕçленĕ. Владимир Андреевич ветеринарсен туслă ушкăнне паянхи кун та ăшă кăмăлпа аса илет. Нумай çул хушши тÿрĕ кăмăлпа ĕçленĕшĕн Наратастă арне темиçе хутчен Шаран районĕнчи ветеринари станцин Хисеп хучĕпе наградăланă, вăл социаллă ăмăртусен çĕнтерÿçи тата коммунизмла ĕç ударникĕ те пулнă.
– Ветеринар ырă кăмăллă, хĕрхенекен, выльăх-чĕрлĕхе чун-чĕререн юратакан çын çеç пулма пултарать. Ветеринар ĕçĕ – чун хушни. Ахальтен мар ĕнтĕ Иван Павлов академик: «Тухтăр çынна сиплет, ветеринар – этемлĕхе» тесе каланă, – тет Владимир Егоров.
Владимир Андреевичăн шанчăклă çемье тылĕ пулнине палăртса хăвармалла. Килĕнче ăна яланах юратнă мăшăрĕ, кил-çурт вучахне упракан, Елизавета Семеновна ĕçрен кĕтсе илнĕ. Вĕсем виçĕ ывăл – Юрий, Анатолий тата Сергей – çитĕнтернĕ. Юрий хăйĕн çемйипе Ĕпхÿре пурăнать, Ĕпхÿри нефтьрен продукци туса кăларакан заводра мастер пулса ĕçлет. Анатолий те çемьеллĕ çын, вăл «ВАГОНМАШ» ОООра (Санкт-Петербург хули) цех ертÿçин тивĕçне пурнăçлать. Кĕçĕн Сергей ывăлĕ Гульфина мăшăрĕпе, Денис тата Эллина ачисемпе ашшĕпе юнашар тымар янă. Вăл Наратастă шкулĕн автобусĕ çинче тăрăшать. Шел пулин те, Елизавета Семеновна йывăр чирленĕ хыççăн 1998 çулта çут тĕнчерен уйрăлса кайнă. Халĕ Владимир Андреевичпа юнашар унăн иккĕмĕш мăшăрĕ – Нина Валерьяновна. Вĕсем 2008 çултанпа пĕрле.
Владимир Егорова курсан вăл 92 çулта тесе калама çук. Çулĕсем самаях пулин те хăйне лайăх туять, мунча хутать, картишĕнчи юра тасатать, вутă çурать. Шаран салине пĕр-пĕр ĕçпе каймалла пулсан кирек мĕнле çанталăкра та çуран тухса утать. Çул хĕррипе çирĕп утакан аслă çулсенчи çынна водительсем пурте пĕлеççĕ, сасă парса паллашаççĕ, чарăнса вырăна илсе çитерме сĕнеççĕ. Анчах вăл: «Урасем утнă чух çĕр-аннеçĕм тăрăх çуран çÿрĕп, çакă мана савăнăç çеç кÿрет», – тет ĕç ветеранĕ.
Руслан ХАФИЗОВ.
Шаран районĕ, Наратастă ялĕ.

Ватлăх килте кĕтсе илеймĕ
Ватлăх килте кĕтсе илеймĕ
Ватлăх килте кĕтсе илеймĕ
Ватлăх килте кĕтсе илеймĕ
Автор:Ирида Матниязова
Читайте нас: