Умра – хаваслă вĕренÿ кунĕсем

Çĕнĕ вĕренÿ çулĕ пуçланнине палăртса шкулсенче пĕрремĕш шăнкăрав янăранăранпа, вăл пĕлменнине – пĕлме, курманнине – курма сĕнсе шăпăрлансене Пĕлÿ çĕршывне йыхравланăранпа виççĕмĕш эрне çитрĕ. Ачасен çуллахи канăвĕ ыттисенчен вăрăмрах, апла вăл хаваслă самантпа та пуян! Çакă, паллах, чи пахи. Анчах умра – хаваслă вĕренÿ кунĕсем, юратнă учительсем ертсе пыракан интереслĕ уроксем.

Сентябрь уйăхĕн 15-мĕшĕнче Ĕпхÿ хулинчи П.М. Миронов ячĕллĕ чăваш вырсарни шкулĕнче çĕнĕ вĕренÿ çулне халалласа «Аван-и, шкул!» мероприяти иртнĕ. Ăна шкул директорĕ Н.Н. Никитина уçнă. Пĕлÿ çурчĕн ертÿçи пухăннисене çĕнĕ вĕренÿ çулĕ ячĕпе ăшшăн саламланă, вĕренекенсене лайăх вĕренсе пыма телей тата ăнăçу суннă. Программăна малалла ачасем тăснă. Вĕсем чăваш поэчĕсен тăван чĕлхепе шкула халалланă сăввисене илемлĕ вуласа панă. Унсăр пуçне вĕренекенсем Шупашкар хулинчи кану кунĕсене сăнлакан презентаципе паллаштарнă. Вероника Никитина чăваш кăйкăрĕ, икĕ хутчен Совет Союзĕн Геройĕ А.Г. Николаев летчик-космонавт çуралнăранпа 95 çул çитнĕ ятпа видеопрезентаци кăтартнă.
Чăваш Республикинчи Вĕрентÿ министерстви «Эткер» пултаруллă ачасемпе çамрăксен центрĕн никĕсĕ çинче çулсерен Раççей Федерацийĕн субъекчĕсенчи тата чикĕ леш енчи йăхташсен ачисем валли кану йĕркелет. Кăçал вĕренÿре лайăх ĕлкĕрсе пыракан, республикăпа хула конкурсĕсене тата фестивальсене хастар хутшăнакан Арина Сафина асăннă лагере кайма тивĕçнĕ. Хĕр ача видео презентаци хатĕрлесе лагерĕн ĕçĕ-хĕлĕпе паллаштарнă.
Мероприяти савăнăçлă та туслă лару-тăрура иртнĕ. Уяв флешмобпа вĕçленнĕ. Унта ачасем хăйсен ашшĕ-амăшĕсемпе чăваш ташшин хусканăвĕсене вĕреннĕ.
Ирида НОВИКОВА.
Ĕпхÿ хули.