+15 °С
Дождь
Инкек
16 Сентября , 14:00
Çул çинче хĕрарăма çапса хăварнă водитель унăн хĕрне компенсаци тÿленĕ
Гафури район прокуратури çул-йĕр инкекĕнче амăшне çухатнă хĕр ачана руль умĕнчи водителе 300 пин тенкĕ компенсаци тÿлеме ыйтса пуçарнă ĕçе вĕçне çитернĕ. Пăтăрмах Архангельск – Красноусольск çул çинче пулса иртнĕ. Суд прокуратура айăплă çынран укçа шыраса илме тăратнă заявление тивĕçтернĕ, мĕншĕн тесен хĕр ача тăлăха юлнă.
Çул çинче хĕрарăма çапса хăварнă водитель унăн хĕрне компенсаци тÿленĕ
Тĕрĕслев ĕçне, вырăнти пĕр хĕрарăм йĕрке хуралçисем патне килсе лару-тăрăва уçăмлатнă хыççăн, Гафури район прокуратури туса ирттернĕ. Асăннă ведомство 2025 çулхи сентябрь уйăхĕнче каçхине Архангельск – Красноусольск çулăн 63-мĕш çухрăмĕнче Toyota Land Cruiser водителĕ çуран пыракана çапса хăварнине уçса панă. Шăпах çа кун хĕрарăм çул урлă каçма юраман вырăнта утса иртме хăтланнă. Вăл машина айне пулса вырăнтах вилнĕ. Унăн ачине опекăна панă.
Водитель тĕлĕшпе уголовлă ĕç пуçарман: следстви вăхăтĕнче унăн айăпне тупса палăртайман.
Çав вăхăтрах прокуратура хĕр ача амăшĕн пурнăçĕ вăхăтсăр татăлнишĕн кăмăл-сипет енчен чĕререн куляннине шута илнĕ. Ведомство хĕр ачана хÿтĕлес тата мораль енчен кÿнĕ сиене саплаштарас тесе суда компенсаци тÿлеме ыйтса заявлени çырнă.
Суд прокуратура ыйтнине шута илнĕ, водителе 300 пин тенкĕ тÿлемелле приговор йышăннă. Тĕрĕслев ведомстви пĕлтернĕ тăрăх, паянхи кун тĕлне çак укçа-тенке хĕр ачана пĕтĕмпех куçарса панă.
Юрий СНЕГОПАД.
