Шахмат вăййи ăс-тăна çивĕчлетет

Çакна ĕнер, апрель уйăхĕн 12-мĕшĕнче, Космонавтика кунĕнче тата Тăван çĕршывăн Аслă вăрçинчи Çĕнтерĕве 80 çул çитнĕ май Ĕпхÿ хулинче Пушкăртстан Республикинчи наци пĕрлĕхĕсем хушшинче шахмат турнирĕ ирттерни те çирĕплетсе панă. Асра юлмалли пĕлтерĕшлĕ ăмăртăва ПР чăваш наципе культура автономийĕ (ЧНКА) тата республикăри Халăхсен туслăх çурчĕ йĕркеленĕ.

Турнир хĕрÿ те пысăк хавхаланупа иртнĕ, тĕрлĕ ÿсĕмри шахматистсен çĕнтерÿшĕн чылай пуç ватма тивнĕ. Пурĕ çичĕ команда (кашнинче виçĕ çын пулнă) хутшăннă. Пĕтĕмлетÿсем тăрăх, Пушкăртстари чăваш наципе культура автономийĕн команди (капитанĕ – Владимир Яковлев, Пелепей районĕнчи ЧНКА ертÿçи) мала тухнă. Иккĕмĕшпе виççĕмĕш вырăнсене ПР Халăхсен туслăх çурчĕпе Çтерлĕ хулинчи ЧНКАн туслă ушкăнĕсем пайланă. Çĕнтерÿçĕсемпе призерсене дипломсемпе асăнмалăх парнесем парса чысланă.

Юрий СНЕГОПАД.