Çĕнтерÿ поездне 25 пин ытла çын кĕтсе илнĕ

Ĕнер, апрель уйăхĕн 29-мĕшĕнче, Пушкăртстанри икĕ чугун çул станцине Çĕнтерÿ поезчĕ килсе чарăннă. «Лебедянка» паллă паровоз ертсе пыракан поезда пĕтĕмĕшле 25 пин ытла çын кĕтсе илнĕ. Çакăн пирки Куйбышев чугун çул пресс-служби пĕлтернĕ.

Чăн малтан Çĕнтерÿ поезчĕ Ĕпхÿре чарăннă, каярах вăл Çтерлĕ хулине çул тытнă. Унта та уяв концерчĕ йĕркеленĕ, кăмăл пуррисене салтак пăттипе хăналанă.

Ретро-поезд йышĕнче Тăван çĕршывăн Аслă вăрçи вăхăтĕнчи техникăран тăракан платформăсем тата «Вилĕмсĕр полк» пассажир вагонĕсем пулнă. Çĕнтерÿ поезчĕ пĕтĕмĕшле 3 пин ытла çухрăм иртĕ, ăна 14 станцинче курма пулĕ.