Куюргазă районĕнче «Çĕнтерÿ утăмĕсем» конкурс иртнĕ

Тăван çĕршыв хÿтĕлевçин çулталăкĕ тата Тăван çĕршывăн Аслă вăрçинче çĕнтернĕренпе 80 çул çитни ахаль календарь датисем кăна мар, наци пĕрлĕхĕн тата патриотизмăн символĕ шутланать. Вăл - Тăван çĕршыв хăрушсăрлăхне тата суверенитетне хÿтĕленисене, паянхи кун та хÿтĕлекенсене хисеп тумалли пулăм.

Çакна шута илсе Куюргазă районĕнчи чăваш культура обществи (председателĕ – Ирина Игнатьева) «Çĕнтерÿ утăмĕсем» («Шаги Победы») сăн ÿкерчĕксен конкурсне йĕркеленĕ. Пултарулăх ăмăртăвне хутшăнма кăмăл тăвакансенчен 12 ĕç килнĕ.

Çак кунсенче Кривле-Илюшке шкулĕнче ăмăртăвăн пĕтĕмлетĕвĕсене тунă. Конкурса хутшăнакансем, парнеллĕ вырăнсене çĕнсе илнисем Дипломсемпе парнесене тивĕçнĕ. Хĕр ачасемпе арçын ачасене Куюргазă районĕнчи чăваш культура обществин председателĕ Ирина Игнатьева саламланă. Çавăн пекех вăл Куюргазă район администрацийĕн пуçлăхĕн çумне Д.З. Акилова парнесемшĕн тав тунă.

Куюргазă районĕ.