Вăрçă ахрăмĕ шăпланмасть

Тăван çĕршывăн Аслă вăрçинче Совет Союзĕ нимĕç фашисчĕсене аркатнăранпа кăçалхи май уйăхĕн 9-мĕшĕнче 80 çул çитрĕ. Вăрçă ахрăмĕ çул хыççăн çул хыçа юлса пырать пулин те, Аслă Çĕнтерÿ уявĕн пĕлтерĕшĕ нихăçан та чакмасть. Ăна мĕнлерех хакпа çĕнсе илнине эпир питĕ лайăх ăнланатпăр. Тăван çĕршыв ирĕклĕхĕпе пăхăнманлăхĕшĕн пынă кĕрешÿре харсăр чунлă çынсен çапăçури тата тылри паттăрлăхне чыслăн сума сăватпăр, тав тăватпăр.

Июнь уйăхĕн 20-мĕшĕнче Çтерлĕ районĕнчи Ямансас ялĕнчи культура çуртĕнче Çтерлĕ хулинчи «Эреш» фольклорпа театр студийĕ (ертÿçи – филологи наукисен кандидачĕ Е.И. Иванова) «Вăрçă хĕрарăмĕсем» музыкăпа театрализациленĕ композици кăтартнă. Ăна чăвашла лартнă.

«Вăрçă хĕрарăмĕсем» музыкăпа театрализациленĕ композици – чĕресен диалогĕ, аса-илÿсен иккĕмĕш пурнăçĕ. Вăхăт машини куракансене вăрçă çулĕсене илсе çитернĕ. Композицинче Тăван çĕршывăн Асла вăрçине, хаяр кунсене хĕрарăм куçĕпе кăтартса панă. Медицина сестрисем, снайперсем, пилотсем, партизансем, диверсантсем, связистсем – хĕрарăма вăрçăра кам кăна пулса çапăçма тÿр килмен…Вĕсен паттăрлăхĕ ĕмĕрех пирĕн чĕресенче упранĕ.

Çтерлĕ районĕ, Ямансас ялĕ.